Planzborrem

Dei Dorf ess dei Planzbeet,
wo dei Some uffgang ess,
wo de Kraft draus gezoo hosch,
fa Worzele se schloo.
Dei Dorf ess dei Borrem.
Dann dut`s Lewe
dich aus deim Borrem
ausgrawe
unn woannerscht
nei setze.

Awwer,
wie bei eme Bäämche,
wo mer umsetzt,
bleiwe doch
e Haufe Krimmele
on de Worzele
hängge.
Wivvel Krimmele,
das kimmt druff oo,
wivvel klääne, feine Worzelcher
du geschlaa hattsch.

Uff die Art
kimmt immer
e bissi
vun deim Planzborrem
met eninn
in dei neier Borrem
unn bleibt
immer bei der,
besche irchendwann emol
absterbsch.