Midde im Minefeld . . .

Geschdern harrich vun meiner Fraa de Ufftraach kriet, beim Inkääfe noch e Ge-  schenk fa die Eriga metsebringe. Om neegschde Freidaach deet se siwwenefuffzich werre. Awwer was schenkt mer heitsedaachs ere Fraa in dem Alder? Jedes hot jo schun alles. Unn die Eriga hatt sowieso nix iwwerich fa so Geschenggeferz wie e elektrischer Korgezieher orrer so anner unneerich Zeich. Mei Fraa saat, om besch- de sollt ich ebbes fa die Kerberpfleech metbringe, so ebbes braicht mer immer. 

Weil ich grad ebbes in de Stadt besorje muscht, sein ich do grad emol in so e Drogeriemart eninngehuppst. Es sollt jo kää 08/15-Zeich sei, nää e bissi ebbes Perseenliches, was grad zu de Eriga basse deet. Vleicht e Schambuu . . .? Nää, wer wääß, vleicht nimmt die Eriga e bestimmt Schambuu, geje Schubbe orrer fa mie Volume. In dem Alder werre jo aach bei de Fraae die Hoor als e bissi dinner. Dann keem jo noch e Creme in Fraach. Do ess mer ää ins Aau gefall „Creme für die Haut ab 50“ Es hot druffgestann, die geeb dere Haut mie Spannkraft unn deet se straffer mache. Gut, wie e Faldehund sieht die Eriga jo jetz nit aus, awwer mer sieht schun immer mie die Falde. Awwer, dann kennt mer das jo so vestieh, dass die Eriga das neerich hätt! Gut, sie hätt’s jo neerich, awwer mer derf bei de Schenggerei nit zu ehrlich sei. Do hunn ich gemerkt, wammer fa Leit so um die fuffzich, sechzich erum, so in meim Alder, besunnersch noch bei Fraae, ebbes fa die Kerberpfleech schengge will, ess mer wie midde in eme Minefeld. Mer kann nore ebbes vekehrt mache. Ich määne jetz nit wie de Manfred, wo uff em letschde Gebortsdaach ganz laut gesaat hatt: „Gell, ehr Fraue, ehr hunn jo e nadeerliches Vidamin C-Debbo . . . jo mer nennt’s Orangschehaut.“ Das hatt der jo extra gesaat, fa die Fraae e bissi se uuze. Awwer met so Geschengge fa die Kerberpfleech ess es schun schwer. Noch schlimmer wär’s, wammer als Geschenk die „Anti-Aging Creme für die reifere Haut“ kääfe deet. Bei so eme Geschenk deet das jo hääße, mer deet määne, die Haut vun dem Gebortsdaachskind wär nimmi zart unn schun e bissi labberich. Das derf mer ere Fraa geniwwer nit zum Ausdruck bringe, uff kääne Fall, aach wann’s dausendmol stimme deet. So e Creme ess nor ebbes fa sich selwer se kääfe.

Om allerschlimmschde wär e Tub „Skin-Repair Extra Refill“. Vun dem Zeich hot e ganz Palett im Gang erumgestann, scheint’s gibt’s do e mordsmeeßicher Bedarf. Wie sich das schun ooheert! „Skin-Repair Extra Refill“. Wie wammer Schlaachlecher in de Stroß noom Winder orrer Haachelschlaachlecher ausfligge mischt. Deletscht hunn ich die Eriga im Schwimmbad im Badeoozuuch getroff, dere ehr Haut sieht werklich ganz schee vedellert aus. So e Tub „Skin-Repair“, wann’s ebbes nitze deet, wär schun es richdiche Geschenk fa se, awwer eerschdens bringt die Zeit halt so klääne kerberliche Mängelcher bei jedem äänzelne met sich unn zweddens brauch mer do die Leit nit met de Geschengge aach noch druff se stumbe.

Also derdoo Ufftraach vun meiner Fraa wär e prima Uffgab fa die Ausbildung vun Kanidade fa de diplomadische Dinscht. Also ungefähr met folgendem Wortlaut: „Kaufen Sie für eine Frau im Lebensalter zwischen 50 und 60 Jahren ein individuelles altersgemäßes nützliches Produkt zur Körperpflege, so dass diese Per- son sich nach Entgegennahme des Geschenks als jung gebliebene begehrenswerte Dame fühlt." Weil ich nie die Absicht hatt, in de diblomadische Dinscht insetreere, hunn ich de Eriga fa ehr Gebortsdaach grad on de Kass e Packung „Mon Chéri“ kääft, weil ich wääß, dass se geere ebbes schnuggelt. Außerdem deerich in dem Drogeriemart dann neegscht Johr bestimmt ebbes fa „Die schlanke Linie für die Frau ab 50“ finne . . . 

Norbert Schneider

Bergstraße 43
55592 Rehborn
Deutschland

Fax:  +49 6753 962830
Tel.:  +49 6753 3358
E-Mail:  info@mundart-schneider.de

www.mundart-schneider.de

"... Norbert Schneiders Mundartarbeiten
kommen aus dem Herzen und
packen Leser wie Zuhörer ..."
Richard Walter