Medium . . .

E Pälzer, noch kää neinzeh Johr,
wo grad sei Abidur gemach,
wollt nix wie on die Uni nor,
unn heit war dert sei eerschder Daach.

Hot nix unn niemand noch gekennt,
drum horrer sich als abgequeelt,
ess alsfort kreiz unn quer gerennt,
dass jo om Enn kää Stembel fehlt

vun dere Stell unn seller Stell,
wo iwwerall er muscht noch hie.
Beim ääne Mol, do war er schnell,
dann wirrer muscht er ewich stieh.

Bes owends endlich war`s geschafft.
Er hatt sich beineegsch selbsch veress.
Dasdoo war stramm, hot koscht veel Kraft.
Er hatt noch nimmol ebbes gess.

Weil er sefreere met sich war
unn hatt e Haufe Zeit gewunn,
saarer bei sich: So, wunnerbar,
heit werd sich ebbes mol gegunn.

Es werd emol noch ingekehrt.
Er war e bissi uff sich stolz:
Derdoo Daach ess mer ebbes wert.
Gut gess werd jetz! Es Geld? Was soll`s!

Er gieht in das Logal eninn,
leet ab, setzt nerrer sich unn wart.
Do kimmt aach schun die Kellnerin,
grießt freindlich unn bringt em die Kart.

Er seet: "E Bier ich geere hätt!"
nimmt druff die Kart unn schleet se uff.
Om liebschde er jo esse deet
die Kart erunner unn enuff.

Dann endlich horrer sich entschloss
fa Rumpsteak, gut gewerzt unn frisch.
Sei Hunger war neegscht grenzelos,
es Esse muscht jetz uff de Disch,

winkt schnell die Kellnerin ebei,
dass dabber die nodeere kann.
Bestellt e Bierche noch debei,
hot Kohldamp wie neegscht dausend Mann.

Die Fraa schreibt uff, dann freet se noo:
"Ein Rumpsteak! Sicher `medium´?"
Do denggt der Pälzer: Gummol do,
`s ess gut, dass ich`s Ladinum hunn!

Aus meiner Schulzeit wääß ich`s noch,
ei, "medium", das ess doch klar,
das hääßt so veel wie "middel" doch,
`s ess gut, dass ich so fleißich war.

Der Pälzer druff seet ohne Schei
unn dut sich dodebei nit schwer:
"Nää, nää, `s derf ruisch e großes sei,
ich hunn grad Hunger wie e Bär."

Norbert Schneider

Bergstraße 43
55592 Rehborn
Deutschland

Fax:  +49 6753 962830
Tel.:  +49 6753 3358
E-Mail:  info@mundart-schneider.de

www.mundart-schneider.de

"... Norbert Schneiders Mundartarbeiten
kommen aus dem Herzen und
packen Leser wie Zuhörer ..."
Richard Walter