Hunner Hummer?

In de Wertschaft uuze sich de Hannes, e Stammgascht, wo jede Daach do se Meddaach isst, met de Hanne unn em Herrmann, de Wertsleit ... :

Hannes: "Gure, Hanne! Heit hunn ich Hunger uff Hummer! Hunneer heit Hummer?"

Hanne: "Ob meer heit Hummer hunn? Moment, ich heere mol noo ... Herrmann, heer emol her, de Hannes will Hummer, hummeer heit Hummer?"

Herrmann: "Hummer? Ei, du heilicher Himmel, grad heit hummer kää Hummer!"

Hanne: "Nää, Hannes, Hummer hummer heit nit!"

Hannes: "Hmh, das ess jo e Hammer, dass neer heit kää Hummer hunn! Hunner dann wenichdens Hummelehaxe?"

Hanne: "Hummelehaxe hummer heit nit, die härre de Metzjer so lang uffgehall beim Ausbääne, unn außerdem hätt em Viehdoggder sei Stembel nit uff das klää Kerlche gebasst!"

Hannes: "Heer, was hunner dann do hinne uff em Herd?"

Hanne: "Hannes, do härrich ebbes fa dich, do ess Hammel drin!"

Hannes: "Ooch, wääsche was, gebb mer dann de bescht e Schnitzel met Pomm Fritt, wie sunscht aach immer!"